മഹാരാഷ്ട്രയിലെ തീരദേശ മത്സ്യത്തൊഴിലാളികൾക്ക് അഞ്ചു ലക്ഷം പച്ചക്കല്ലുമ്മക്കായ വിത്തുകൾ സിഎംഎഫ്ആർഐ നൽകി

24 ഒക്ടോബർ 2026

ഐസിഎആർ-സെൻട്രൽ മറൈൻ ഫിഷറീസ് റിസർച്ച് ഇൻസ്റ്റിറ്റ്യൂട്ട് (സിഎംഎഫ്ആർഐ) മഹാരാഷ്ട്രയിലെ മത്സ്യത്തൊഴിലാളികൾക്കും ആദിവാസി സമൂഹങ്ങൾക്കും അഞ്ചു ലക്ഷം ഹാച്ചറി വിത്തുകൾ കൂടി നൽകി.
ഇതോടെ കഴിഞ്ഞ ആറു മാസത്തിനിടെ നൽകിയ ആകെ വിത്തുകളുടെ എണ്ണം പത്തു ലക്ഷമായി.
2-4 മില്ലിമീറ്റർ വലുപ്പമുള്ള പച്ചക്കല്ലുമ്മക്കായ വിത്തുകൾ തിരുവനന്തപുരത്തെ വിഴിഞ്ഞം റീജിയണൽ സെന്ററിലെ ബൈവാൾവ് ഹാച്ചറിയിൽ പ്രധാനമന്ത്രി മത്സ്യ സമ്പദ യോജന (പിഎംഎംഎസ്‌വൈ) പദ്ധതിക്കു കീഴിലാണ് ഉൽപ്പാദിപ്പിച്ചത്.
മദ്രാസ് റീജിയണൽ സ്റ്റേഷനിൽ ഉൽപ്പാദിപ്പിച്ച ഒരു ലക്ഷം മുത്തുച്ചിപ്പി വിത്തുകളും മഹാരാഷ്ട്രയ്ക്ക് നൽകി.
മഹാരാഷ്ട്ര തീരത്ത് സുസ്ഥിര ബൈവാൾവ് കൃഷി പ്രോത്സാഹിപ്പിച്ച് സമുദ്രമത്സ്യ ഗവേഷണം ഉപജീവന അവസരങ്ങളാക്കി മാറ്റുകയാണ് ലക്ഷ്യമെന്ന് സിഎംഎഫ്ആർഐ ഡയറക്ടർ ഡോ. ഗ്രിൻസൺ ജോർജ് പറഞ്ഞു.