അമ്മയിൽ നിന്ന് കുഞ്ഞിലേക്കുള്ള എച്ച്.ഐ.വി, സിഫിലിസ് പകർച്ച ഒഴിവാക്കിയതിന് ലോകാരോഗ്യ സംഘടനയുടെ സ്ഥിരീകരണം നേടിയ ലോകത്തിലെ ആദ്യ രാജ്യം ക്യൂബ

വിശദ വായന

അമ്മയിൽ നിന്ന് കുഞ്ഞിലേക്കുള്ള എച്ച്.ഐ.വി, സിഫിലിസ് പകർച്ച ഒഴിവാക്കിയെന്ന സ്ഥിരീകരണം ലോകാരോഗ്യ സംഘടനയിൽ നിന്ന് നേടിയ ലോകത്തിലെ ആദ്യ രാജ്യമായി ക്യൂബ മാറിയെന്ന് ആ സംഘടന അറിയിച്ചു. ഇതിനായി 2010 മുതൽ ക്യൂബയിലും അമേരിക്കൻ ഭൂഖണ്ഡത്തിലെ മറ്റു രാജ്യങ്ങളിലും ഒരു മേഖലാ പദ്ധതിയിൽ ലോകാരോഗ്യ സംഘടനയും പാൻ അമേരിക്കൻ ആരോഗ്യ സംഘടനയും (PAHO) പങ്കാളികളുമായി ചേർന്ന് പ്രവർത്തിച്ചിരുന്നു. ഈ രണ്ട് സംഘടനകൾ ചേർന്ന് വിളിച്ചുചേർത്ത ഒരു അന്താരാഷ്ട്ര വിദഗ്ധ സംഘം 2015 മാർച്ചിൽ ക്യൂബ സന്ദർശിച്ചു; അഞ്ച് ദിവസത്തെ സന്ദർശനത്തിൽ ദ്വീപിലെ ആരോഗ്യ കേന്ദ്രങ്ങളും പരീക്ഷണശാലകളും സർക്കാർ കാര്യാലയങ്ങളും അവർ കണ്ടു. അർജന്റീന, ബഹാമസ്, ബ്രസീൽ, കൊളംബിയ, ഇറ്റലി, ജപ്പാൻ, നിക്കരാഗ്വ, സുരിനാം, അമേരിക്കൻ സംയുക്ത നാടുകൾ, സാംബിയ എന്നിവിടങ്ങളിൽ നിന്നുള്ളവരായിരുന്നു സംഘാംഗങ്ങൾ. ഗർഭകാല പരിചരണവും പരിശോധനയും നേരത്തെ ലഭ്യമാക്കുക, പരിശോധനയിൽ രോഗം കണ്ടെത്തുന്ന സ്ത്രീകൾക്കും അവരുടെ കുഞ്ഞുങ്ങൾക്കും ചികിത്സ നൽകുക, തുല്യതയുള്ളതും എല്ലാവർക്കും പ്രാപ്യവുമായ സാർവത്രിക ആരോഗ്യ സംവിധാനത്തിലൂടെ ഈ സേവനങ്ങൾ എത്തിക്കുക — ഇവയാണ് ക്യൂബ ചെയ്തത്. 2013-ൽ ക്യൂബയിൽ എച്ച്.ഐ.വി.യോടെ ജനിച്ചത് രണ്ട് കുഞ്ഞുങ്ങൾ മാത്രം; ജന്മനാ സിഫിലിസുമായി ജനിച്ചത് 3 കുഞ്ഞുങ്ങൾ മാത്രം. ഒരു രാജ്യം ഒരു നിശ്ചിത സമയത്ത് അന്താരാഷ്ട്രതലത്തിൽ നിർണ്ണയിച്ച ലക്ഷ്യങ്ങൾ നേടിയെന്ന് സാക്ഷ്യപ്പെടുത്താനാണ് ലോകാരോഗ്യ സംഘടന ഈ സ്ഥിരീകരണം നൽകുന്നത്; പദ്ധതികൾ തുടർന്നും നടത്തേണ്ടത് രാജ്യങ്ങളുടെ ബാധ്യതയാണ്.