ആദ്യ ബിംസ്ടെക് ആഭ്യന്തരമന്ത്രിമാരുടെ യോഗത്തിന് ഇന്ത്യ ആതിഥേയത്വം വഹിച്ചു; മന്ത്രിമാർ ഡൽഹി പ്രഖ്യാപനം അംഗീകരിച്ചു

13 ഒക്ടോബർ 2026

ബിംസ്ടെക് ആഭ്യന്തരമന്ത്രിമാരുടെ ആദ്യ മന്ത്രിതല യോഗത്തിന് ന്യൂഡൽഹിയിൽ ഇന്ത്യ ആതിഥേയത്വം വഹിച്ചു. കേന്ദ്ര ആഭ്യന്തരമന്ത്രി അമിത് ഷാ അധ്യക്ഷത വഹിച്ചു. ബംഗ്ലാദേശ്, ഭൂട്ടാൻ, ഇന്ത്യ, മ്യാൻമർ, നേപ്പാൾ, ശ്രീലങ്ക, തായ്‌ലൻഡ് എന്നീ രാജ്യങ്ങളിൽ നിന്നുള്ള മന്ത്രിമാരും പ്രതിനിധികളും പങ്കെടുത്തു. മുന്നൊരുക്കമായി നടന്ന മുതിർന്ന ഉദ്യോഗസ്ഥരുടെ യോഗത്തിന് കേന്ദ്ര ആഭ്യന്തര സെക്രട്ടറി നേതൃത്വം നൽകി. 2018ലെ നാലാം ബിംസ്ടെക് ഉച്ചകോടിയാണ് ആഭ്യന്തരമന്ത്രിമാരുടെ ഇത്തരം യോഗങ്ങൾ നടത്താൻ തീരുമാനിച്ചത്. 2025 ഏപ്രിൽ 4ന് ബാങ്കോക്കിൽ നടന്ന ആറാം ഉച്ചകോടിയിൽ ആദ്യ യോഗത്തിന് ആതിഥേയത്വം വഹിക്കാമെന്ന് പ്രധാനമന്ത്രി നരേന്ദ്ര മോദി വ്യക്തമാക്കിയിരുന്നു. മനുഷ്യക്കടത്തിനെതിരായ ബിംസ്ടെക് കൺവെൻഷൻ, ലഹരിമരുന്നുകളും മാനസികോത്തേജക പദാർഥങ്ങളും മുന്നോടി രസവസ്തുക്കളും ഉൾപ്പെടുന്ന ലഹരിനിയന്ത്രണ കർമപദ്ധതി, കള്ളപ്പണം വെളുപ്പിക്കലിനും ഭീകരപ്രവർത്തന ധനസഹായത്തിനും എതിരായ ശേഷിവികസന ധാരണാപത്രം, അനധികൃത ധനപ്രവാഹം സംബന്ധിച്ച കർമപദ്ധതി, ബംഗാൾ ഉപസാഗര മേഖലയിലെ ദുരന്തപ്രതിരോധ സന്നദ്ധതാ കർമപദ്ധതി എന്നിവ മന്ത്രിമാർ അംഗീകരിച്ചു. ലഹരിനിയന്ത്രണം, ഭീകരവിരുദ്ധ-നിയമ സഹകരണം, പിടികിട്ടാപ്പുള്ളികളെ തിരിച്ചെത്തിക്കൽ, സൈബർ സുരക്ഷയും സൈബർ കുറ്റാന്വേഷണവും, സ്ഥാപനതല സഹകരണവും ശേഷിവികസനവും എന്നിങ്ങനെ അഞ്ച് മുൻഗണനാ മേഖലകൾ നിർണയിച്ചു. ആറാം ഉച്ചകോടിയിൽ പ്രധാനമന്ത്രി മുന്നോട്ടുവച്ച ബിംസ്ടെക് ദുരന്തനിവാരണ കേന്ദ്രം ഗുജറാത്തിലെ ജാംനഗറിൽ സ്ഥാപിക്കാനാണ് പദ്ധതിയെന്ന് അമിത് ഷാ പറഞ്ഞു; നിർദിഷ്ട കേന്ദ്രം പ്രവർത്തനക്ഷമമാക്കുന്നതിൽ അംഗരാജ്യങ്ങൾ സജീവമായി പങ്കാളികളാകണമെന്നും അദ്ദേഹം ആവശ്യപ്പെട്ടു. വിവരക്കൈമാറ്റം, പരസ്പര നിയമസഹായം, കുറ്റവാളി കൈമാറ്റം, ശേഷിവികസനം എന്നീ തത്ത്വങ്ങൾ മുന്നോട്ടുവയ്ക്കുന്ന ഡൽഹി പ്രഖ്യാപനം യോഗം അംഗീകരിച്ചു.