കാർഗിൽ ജില്ലാ കളക്ടർ ദ്രാസ് ജില്ലയുടെ അധിക ചുമതല ഏറ്റു

6 നവംബർ 2026

ലഡാക്കിലെ ഏറ്റവും പുതിയ ജില്ലകളിലൊന്നായ ദ്രാസിന്റെ ജില്ലാ കളക്ടറായുള്ള അധിക ചുമതല കാർഗിൽ ജില്ലാ കളക്ടർ രാകേശ് കുമാർ ഐഎഎസ് (IAS) ഏറ്റെടുത്തു. ചുമതലയേറ്റ ശേഷം ജീവനക്കാരുടെ ഹാജർ, വിഭാഗങ്ങൾ തമ്മിലുള്ള സഹകരണം, ജില്ലയുടെ തിരഞ്ഞെടുപ്പ് ഒരുക്കങ്ങൾ എന്നിവ അദ്ദേഹം വിലയിരുത്തി. വോട്ടെടുപ്പ് സാമഗ്രികൾ സൂക്ഷിക്കുന്ന ആർ ആൻഡ് ബി കെട്ടിടത്തിലെ സ്ട്രോങ് റൂമും കൗണ്ടിങ് റൂമും പരിശോധിച്ചു; സുരക്ഷയും രഹസ്യസ്വഭാവവും സംബന്ധിച്ച ചട്ടങ്ങൾ കർശനമായി പാലിക്കാൻ ഉദ്യോഗസ്ഥർക്ക് നിർദേശം നൽകി. സോജില പാസ് തുറക്കുന്നതിന്റെയും അടയ്ക്കുന്നതിന്റെയും സമയക്രമം, ജില്ലയുടെ ശൈത്യകാല - ഹിമപാത ഒരുക്കങ്ങൾ എന്നിവയും യോഗം ചർച്ച ചെയ്തു. ദ്രാസ് പോലീസ് സൂപ്രണ്ട് കാചോ ഇഷ്തിയാഖും സബ് ഡിവിഷണൽ മജിസ്ട്രേറ്റ് വിശാൽ അത്രിയും പങ്കെടുത്തു. പുതുതായി നിർമിച്ച സോണൽ എജ്യുക്കേഷൻ ഓഫീസർ കെട്ടിടവും കളക്ടർ പരിശോധിച്ചു; ഒരാഴ്ചയ്ക്കുള്ളിൽ ഓഫീസ് മാറ്റാൻ നിർദേശിച്ചു.