ഒരു കൺട്രോൾ സെന്റർ, ആംബുലൻസുകളുടെ ഒരു ശൃംഖല: ഗോൾഡൻ ഗോൾ പദ്ധതി പ്രവർത്തിക്കുന്ന വിധം

വിശദ വായന

ഗുരുതര പരിക്കേറ്റ റോഡപകട ഇരകളുടെ ജീവൻ രക്ഷിക്കാൻ, കൃത്യസമയത്ത് മികച്ച ചികിത്സ ഉറപ്പാക്കുന്ന ഗോൾഡൻ ഗോൾ എന്ന സമഗ്ര അടിയന്തര പരിചരണ പദ്ധതിക്ക് ആരോഗ്യവകുപ്പ് തുടക്കമിടുന്നു. പരിക്കിന്റെ സ്വഭാവവും ഗുരുതരാവസ്ഥയും തിരിച്ചറിഞ്ഞ്, ഏറ്റവും യോജിച്ച ആശുപത്രിയിൽ വേഗത്തിൽ ചികിത്സ എത്തിക്കുകയാണ് ലക്ഷ്യം. ആദ്യഘട്ടത്തിൽ തിരുവനന്തപുരം, കൊല്ലം, ആലപ്പുഴ ജില്ലകളിലാണ് പദ്ധതി പരീക്ഷണാടിസ്ഥാനത്തിൽ നടപ്പാക്കുന്നത്. 108 ആംബുലൻസുകൾക്കൊപ്പം ആരോഗ്യവകുപ്പിന്റെയും മെഡിക്കൽ വിദ്യാഭ്യാസ വകുപ്പിന്റെയും കീഴിലുള്ള സർക്കാർ ആംബുലൻസുകളെയും ഏകോപിപ്പിക്കാൻ ഇന്റഗ്രേറ്റഡ് കമാൻഡ് ആൻഡ് കൺട്രോൾ സെന്റർ വിപുലീകരിക്കും. തുടർഘട്ടങ്ങളിൽ സ്വകാര്യ ആംബുലൻസുകൾ, സ്വകാര്യ ആശുപത്രികൾ, സന്നദ്ധസംഘടനകൾ എന്നിവയെയും ഈ ശൃംഖലയിൽ പങ്കാളികളാക്കും. ട്രാക്കിങ്, മാപ്പിങ്, കമ്പ്യൂട്ടർ അധിഷ്ഠിത ഡിസ്പാച്ച് സംവിധാനം എന്നിവയിലൂടെ അപകടസ്ഥലത്തേക്ക് ഏറ്റവും അടുത്തുള്ള അനുയോജ്യമായ ആംബുലൻസ് വേഗത്തിൽ എത്തിക്കും. രോഗിയുടെ ആരോഗ്യനിലയും പരിക്കുകളുടെ വിവരങ്ങളും ആംബുലൻസിൽ നിന്ന് കൺട്രോൾ സെന്ററിലേക്കും ആശുപത്രിയിലേക്കും കൈമാറും; രോഗി എത്തുന്നതിനു മുൻപേ ഡോക്ടർമാർക്കും ട്രോമാ ചികിത്സാ സംഘങ്ങൾക്കും ഒരുങ്ങാൻ ഇതിലൂടെ കഴിയും. സർക്കാർ ആശുപത്രികളിലും, കാസ്പ് (KASP), പിഎം-ജെഎവൈ (PM-JAY) പദ്ധതികളിൽ ഉൾപ്പെട്ട സ്വകാര്യ ആശുപത്രികളിലും അടിയന്തര ചികിത്സ ഉറപ്പാക്കും.