തിരുവനന്തപുരത്ത് പബ്ലിക് അക്കൗണ്ട്സ് കമ്മിറ്റി അധ്യക്ഷന്മാർ ഡിജിറ്റൽ ഓഡിറ്റ് നിരീക്ഷണ പ്രമേയം അംഗീകരിച്ചു

4 നവംബർ 2026

ലോക്സഭാ സെക്രട്ടേറിയറ്റ് സംഘടിപ്പിച്ച് തിരുവനന്തപുരത്തു നടന്ന പാർലമെന്റിന്റെയും സംസ്ഥാന - കേന്ദ്രഭരണ പ്രദേശ നിയമസഭകളുടെയും പബ്ലിക് അക്കൗണ്ട്സ് കമ്മിറ്റി (Public Accounts Committee) അധ്യക്ഷന്മാരുടെ സമ്മേളനം ഓഡിറ്റും ഉത്തരവാദിത്തവും സംബന്ധിച്ച പ്രമേയം അംഗീകരിച്ചു. അനുവദിച്ച കാര്യത്തിനു തന്നെ പൊതുപണം ചെലവാക്കുന്നുണ്ടോ എന്നു സൂക്ഷ്മമായി പരിശോധിക്കുമെന്നു പ്രമേയം പറയുന്നു. അനുഭവങ്ങളും മികച്ച രീതികളും പങ്കുവയ്ക്കാൻ ഒരു പൊതു ഡിജിറ്റൽ പോർട്ടൽ വേണമെന്നും, എല്ലാ സംസ്ഥാന - കേന്ദ്രഭരണ പ്രദേശ കമ്മിറ്റികളിലും ഓഡിറ്റ് പാരഗ്രാഫ് നിരീക്ഷണ സംവിധാനം ഉൾപ്പെടെ ഡിജിറ്റൽ സംവിധാനങ്ങൾ വേണമെന്നും ആവശ്യപ്പെടുന്നു. ഓഡിറ്റ് പാരഗ്രാഫുകളിലും കമ്മിറ്റി ശുപാർശകളിലും സ്വീകരിച്ച നടപടി റിപ്പോർട്ടുകൾ നൽകാൻ നിശ്ചിത സമയപരിധിയുള്ള കർമപദ്ധതിയും പ്രമേയത്തിലുണ്ട്. സംസ്ഥാന കമ്മിറ്റികൾ മാസം കുറഞ്ഞത് മൂന്നു യോഗം ചേരണം. കൺട്രോളർ ആൻഡ് ഓഡിറ്റർ ജനറലിന്റെ (Comptroller and Auditor General) ഓഫിസുമായി കൂടുതൽ സഹകരണവും ആവശ്യപ്പെടുന്നു. നവംബർ 3, 4 തീയതികളിലായിരുന്നു സമ്മേളനം.