ഗ്രൂപ്പ് ബി, സി, ഡി തസ്തികകൾക്കായി സ്റ്റാഫ് സെലക്ഷൻ കമ്മീഷൻ സ്ഥാപിക്കാൻ ത്രിപുര മന്ത്രിസഭയുടെ അംഗീകാരം
8 ഒക്ടോബർ 2026
സംസ്ഥാന സർക്കാരിനു കീഴിലെ ഗ്രൂപ്പ് ബി, സി, ഡി തസ്തികകളിലേക്കുള്ള നിയമന പരീക്ഷകൾ നടത്താൻ ത്രിപുര സ്റ്റാഫ് സെലക്ഷൻ കമ്മീഷൻ (ടിഎസ്എസ്സി) സ്ഥാപിക്കാൻ ത്രിപുര മന്ത്രിസഭ തീരുമാനിച്ചു. മന്ത്രി സുശാന്ത ചൗധരിയാണ് തീരുമാനങ്ങൾ അറിയിച്ചത്. സെക്കൻഡറി വിദ്യാഭ്യാസ വകുപ്പിൽ ഒൻപത്, പത്ത് ക്ലാസുകളിലേക്കുള്ള 700 ഗ്രാജുവേറ്റ് ടീച്ചർ തസ്തികകൾ സൃഷ്ടിക്കാനും, എലിമെന്ററി വിദ്യാഭ്യാസ വകുപ്പിലെ 361 അധ്യാപക തസ്തികകൾ (75 ഗ്രാജുവേറ്റ് ടീച്ചർ, 286 അണ്ടർ ഗ്രാജുവേറ്റ് ടീച്ചർ) നികത്താനും മന്ത്രിസഭ അംഗീകാരം നൽകി. അഗർത്തല മുനിസിപ്പൽ കോർപ്പറേഷനിലേക്ക് 213 പേരെ നിയമിക്കാനും അംഗീകാരം നൽകി. ദുർഗാപൂജ ആഘോഷങ്ങൾക്കായി ഏകദേശം 9.92 ലക്ഷം റേഷൻ കാർഡ് ഉടമകൾക്ക് ഒക്ടോബർ, നവംബർ മാസങ്ങളിൽ ന്യായവില കടകൾ വഴി 1 കിലോ പഞ്ചസാര, 2 കിലോ മാവ്, 500 ഗ്രാം റവ എന്നിവ സൗജന്യമായി ലഭിക്കും. പട്ടികജാതി ക്ഷേമ ഉപസമിതിയുടെ സിറ്റിങ് അലവൻസ് 100 രൂപയിൽ നിന്ന് 200 രൂപയായും, ന്യൂനപക്ഷ ക്ഷേമ ബോർഡിങ് വിദ്യാർഥികളുടെ പ്രതിദിന അലവൻസ് 65 രൂപയിൽ നിന്ന് 100 രൂപയായും വർധിപ്പിച്ചു.