കൊളംബിയയിലെ സ്പെഷ്യൽ ജുറിസ്ഡിക്‌ഷൻ ഫോർ പീസിന്റെ വിധിക്കു ശേഷം നാശനഷ്ടം പരിഹരിക്കാൻ എക്കോപെട്രോളിനോട് യുഎൻ വിദഗ്ധർ ആവശ്യപ്പെട്ടു

14 ഒക്ടോബർ 2026

സായുധ സംഘർഷത്തിന്റെ ഇരകൾക്ക് നഷ്ടപരിഹാരം നൽകണമെന്ന് കൊളംബിയയുടെ പൊതുമേഖലാ എണ്ണക്കമ്പനിയായ എക്കോപെട്രോളിനോട് യുഎൻ ഹ്യൂമൻ റൈറ്റ്സ് കൗൺസിൽ നിയമിച്ച സ്വതന്ത്ര വിദഗ്ധർ ആവശ്യപ്പെട്ടു. കൊളംബിയയുടെ സ്പെഷ്യൽ ജുറിസ്ഡിക്‌ഷൻ ഫോർ പീസ് അഥവാ ഹെപ്പെയുടെ മാക്രോ-കേസ് 08ലെ വിധിക്കു ശേഷമാണ് ഈ പ്രസ്താവന. സംഘർഷ കാലത്തു നടന്ന ഗുരുതരമായ മനുഷ്യാവകാശ ലംഘനങ്ങൾ, യുദ്ധക്കുറ്റങ്ങൾ, മനുഷ്യരാശിക്കെതിരായ കുറ്റങ്ങൾ എന്നിവയ്ക്ക് നിരവധി സർക്കാർ ഉദ്യോഗസ്ഥരും എക്കോപെട്രോളിന്റെ ഒരു ഡയറക്ടറും ഉത്തരവാദികളാണെന്ന് ആ വിധി കണ്ടെത്തി. കൊളംബിയയുടെ എണ്ണ തലസ്ഥാനം എന്ന് യുഎൻ വിശേഷിപ്പിക്കുന്ന ബറാൻകാബെർമേഹ നഗരമാണ് കേസിന്റെ കേന്ദ്രം. പുനഃസ്ഥാപന സമീപനത്തോടെ ഇരകളോടും അവരുടെ സംഘടനകളോടും ആത്മാർഥമായി സംവാദം നടത്താൻ വിദഗ്ധർ കമ്പനിയോട് ആവശ്യപ്പെട്ടു. നഷ്ടപരിഹാരം രൂപപ്പെടുത്തുന്നതിലും നടപ്പാക്കുന്നതിലും ഇരകൾ വെറും കാഴ്ചക്കാരായിരിക്കരുത്, പങ്കാളികളാകണം എന്നും അവർ പറഞ്ഞു. യുഎൻ ഗൈഡിങ് പ്രിൻസിപ്പിൾസ് ഓൺ ബിസിനസ് ആൻഡ് ഹ്യൂമൻ റൈറ്റ്സ് അവർ ചൂണ്ടിക്കാട്ടി. അതനുസരിച്ച് കമ്പനികൾ മനുഷ്യാവകാശങ്ങളെ മാനിക്കുകയും തങ്ങൾ ഉണ്ടാക്കിയ നാശനഷ്ടം പരിഹരിക്കാൻ സഹായിക്കുകയും വേണം. എക്കോപെട്രോളിന്റെ ഭൂരിപക്ഷ ഷെയർ ഉടമ കൊളംബിയൻ സർക്കാരാണ്; അതിനാൽ ഉത്തരവാദിത്തം സർക്കാരിനും ഉണ്ടെന്ന് വിദഗ്ധർ പറഞ്ഞു. ഹെപ്പെയും കാണാതായവരെ തിരയുന്ന യൂണിറ്റും ഉൾപ്പെടുന്ന കൊളംബിയയുടെ സമഗ്ര സമാധാന സംവിധാനത്തിന് മതിയായ ധനസഹായം വേണമെന്ന ആവശ്യവും അവർ ആവർത്തിച്ചു.