കേരള ലളിതകലാ അക്കാദമിയുടെ 'പുനർജ്ജനി'; സ്വന്തം ശേഖരത്തിൽ നിന്ന് മുപ്പത് ചിത്രങ്ങൾ

9 ഒക്ടോബർ 2026

കേരള ലളിതകലാ അക്കാദമിയുടെ സ്വന്തം ശേഖരത്തിൽ നിന്ന് തിരഞ്ഞെടുത്ത ചിത്രങ്ങളുടെ പ്രദർശനമായ 'പുനർജ്ജനി' ഒക്ടോബർ 13 ന് തിരുവനന്തപുരം വൈലോപ്പിള്ളി സംസ്കൃതി ഭവനിലെ അക്കാദമി ആർട്ട് ഗാലറിയിൽ ആരംഭിക്കും. രാവിലെ 11 ന് അക്കാദമി ചെയർപേഴ്സൺ പ്രൊഫ. പ്രകാശ് മൂർത്തി ഉദ്ഘാടനം ചെയ്യും. അക്കാദമി സെക്രട്ടറി വൈക്കം എം. കെ. ഷിബുവും പങ്കെടുക്കും. കഴിഞ്ഞ വർഷങ്ങളിൽ അക്കാദമി സംഘടിപ്പിച്ച ചിത്രരചനാ ക്യാമ്പുകളിൽ നിന്ന് തിരഞ്ഞെടുത്ത മുപ്പത് ചിത്രകാരന്മാരുടെ മുപ്പത് ചിത്രങ്ങളാണ് പ്രദർശനത്തിലുള്ളത്. അക്കാദമിയുടെ ശേഖരവും ഗാലറികളും പുനരുജ്ജീവിപ്പിക്കാൻ പുതിയ ഭരണസമിതി വിഭാവനം ചെയ്ത പദ്ധതിയുടെ ആദ്യ ചുവടുവയ്പാണ് ഈ പ്രദർശനമെന്ന് അക്കാദമി പറയുന്നു. കൃതികളുടെ കലാമൂല്യവും അർഥവും പൊതുജനങ്ങളിലേക്ക് എത്തിക്കാൻ തുടർ പ്രദർശനങ്ങളിൽ ക്യൂറേറ്റർമാരെ പങ്കാളികളാക്കും. ചിത്രകാരന്മാർ ഒത്തുചേരുകയും പരസ്പരം സംവദിക്കുകയും ചെയ്യുന്ന ഇടങ്ങളായി ഈ പ്രദർശനങ്ങൾ മാറുമെന്ന് അക്കാദമി പ്രതീക്ഷിക്കുന്നു.