ഫ്രണ്ടിയർ നാഗാലാൻഡ് ടെറിട്ടോറിയൽ അതോറിറ്റി ബിൽ 2026-ന് (Frontier Nagaland Territorial Authority Bill) രാഷ്ട്രപതി ദ്രൗപദി മുർമുവിന്റെ അനുമതി

25 ഒക്ടോബർ 2026

ഫ്രണ്ടിയർ നാഗാലാൻഡ് ടെറിട്ടോറിയൽ അതോറിറ്റി (FNTA) ബിൽ 2026-ന് രാഷ്ട്രപതി ദ്രൗപദി മുർമു അനുമതി നൽകി. 2026 സെപ്റ്റംബർ 3-ന് നാഗാലാൻഡ് നിയമസഭ ഐകകണ്ഠ്യേനയാണ് ബിൽ പാസാക്കിയത്. മുഖ്യമന്ത്രി നെയ്ഫ്യു റിയോ (Neiphiu Rio) സമൂഹമാധ്യമമായ എക്സിലെ (X) കുറിപ്പിലൂടെയാണ് വിവരം അറിയിച്ചത്. രാഷ്ട്രപതിക്ക് നന്ദി പറഞ്ഞ അദ്ദേഹം, നടപടികൾ ഏകോപിപ്പിച്ചതിന് കേന്ദ്ര ആഭ്യന്തര മന്ത്രാലയത്തെയും അഭിനന്ദിച്ചു. കിഴക്കൻ നാഗാലാൻഡിലെ (Eastern Nagaland) ജനങ്ങളുടെ ആഗ്രഹങ്ങൾ സാക്ഷാത്കരിക്കുന്നതിലേക്കുള്ള പ്രധാന ചുവടാണിതെന്ന് റിയോ പറഞ്ഞു. രാഷ്ട്രപതിയുടെ പരിഗണനയ്ക്കായി മാറ്റിവെക്കുന്ന സംസ്ഥാന ബിൽ രാഷ്ട്രപതിയുടെ അനുമതി ലഭിച്ചാൽ മാത്രമേ നിയമമാകൂ.